仍然係繼續忙於工作，不過近期周圍睇，發現各大餐廳、酒店，都唔少得有一兩部電視喺度。由於慳位關係，依家對電視機嘅要求愈嚟愈高，又要高清、又要薄身、又要耐用，能做到以上要求嘅公司唔多。
TCL多媒體（01070）主要業務係生產同銷售彩色電視機，以及賣相關零件，同埋銷售同生產其他影音產品。彩色電視機就係今日嘅LCD，但呢個市場已經做到競爭非常激烈，因為街邊只有LCD賣，款式愈來愈新，質素愈來愈好。繼續鬥薄身唔係唔得，但會遇到技術上嘅瓶頸。故此，TCL依家開始研發一個新市場，就係LED機！
LED機係背光液晶電視機，能夠做到超薄身，喺法國、西班牙同瑞士等市場嘅銷售額都不斷增長，可見LED機將會係未來電視嘅主流。歐洲雖然依家債務纏身，但佢哋通常喺品牌上面做嘅嘢都快人一步。
TCL最新計劃就係提升銷售量同銷售價格，以及慢慢以LED機取締LCD機市場，達到改善毛利率嘅策略，因為LED機嘅毛利遠比LCD機高，技術含量亦非比尋常。目前集團以中國為主力銷售市場，計劃喺中國LED市場入面獲得50%以上市佔率。如果呢個可打響頭炮，隨後推出產品到各個新興市場，利錢無限！公司近幾年用咗好多錢喺科研方面，未來幾年會係收成期，一於繼續追蹤，出發！
香港大學電子金融服務榮譽助理教授徐燦傑