「股壇長毛」David Webb尋日又發炮，撰文「明寸」政府干預本港金融市場，直指特首「命令」港交所（00388）搬去重建後嘅政府總部西翼大樓。
今年施政報告提到，政府總部西翼重建後嘅大樓，部分樓面「將會」用作港交所同證監會辦公室之用。Webb炮轟，政府冇理會到港交所作為一間上市公司，搬遷嘅決定應由董事局同股東自行決定，並非直接由政府「指定」。
上址擬以招標形式發展，Webb狠批政府，喺出售發展權嘅同時，竟然包括考慮向發展商「指定」項目嘅主要租戶，尤其係當港交所係一間私人機構，而非政府部門。
再講，政府修訂有關重建計劃，話會擴大公眾休憩用地面積，大幅減少商場規模。Webb批評，呢個咪就係特首微觀管理嘅「典範」，政府要決定大樓需要幾多零售空間，點解唔畀自由市場決定如何使用物業，土地嘅買家自然會有自己嘅規劃，將土地價值發揮到最好。
夏佳理明年四月就退任港交所主席，Webb最後仲「貼」現任港交所董事史美倫可能會接任。不過，有中環友就質疑，查太出年亦做咗港交所董事6年，按規定明年亦需退任，何解仲可做主席呢？
余詩韻