絲絲講場：朱太幫老公擺大壽
金利豐（01031）行政總裁朱太朱李月華呢排真係好忙，除咗忙公司嘢，仲要搞參選新一屆特首選委會。絲絲知道佢過去個周末，仲同過百人飛咗去海南島開會添！呢個會，咪就係佢老公、金利豐主席朱沃裕嘅超豪生日會囉。
政商界名人出席派對
尋日係朱生六十歲牛一嘅大好日子，由於剛屆耳順之年，於是朱太決定搞大佢。收市之後，成間金利豐都好熱鬧，又切蛋糕又食「浦飛」。
其實，個慶祝活動早就喺上星期六開始，朱太響海南島三亞包咗成間酒店連埋沙灘，仲包食宿同機票，請咗過百個親朋戚友同生意夥伴過去，大家上星期六響沙灘度開生日派對，同朱生慶祝，好多知名嘅上市公司老細、金融界、政界、明星都有畀面到場，大家仲獲贈一件彩色「夏老威」衫，着住摸酒杯傾偈，場面真係成個領袖峰會咁架。平時朱太名頭太響，但今次總算由朱生做番主角。
余詩韻