滙控（00005）行政總裁歐智華今個月應該好忙，又要公布第三季業績，裁員縮減開支，月底又要開董事會，做到馬不停蹄。相反，前滙控行政總裁紀勤喺十一月應該比歐智華輕鬆。絲絲記得，紀勤上年話過，今年嘅十一月會參加喺紐約舉行嘅馬拉松。
上年十二月嘅時候，紀勤出席過一個英國傳媒訪問，提及過退休後要減肥瘦身，佢話佢同一個香港企業家落咗個賭注，話要喺退休後減二十公斤，如果唔成功嘅話，就要將港幣一百萬嘅賭注捐去畀慈善團體。然後參加今年十一月舉辦嘅紐約市馬拉松。絲絲記得滙豐亞太區行政總裁邵銘高都有一個大肚腩，可能因為啲高層出席飯局應酬多啦。
據絲絲所知，紐約今年只得一個馬拉松，就喺上個星期十一月六日舉行。絲絲尋日上咗馬拉松嘅官方網站，諗住睇吓今年參加選手嘅跑步成績嘅時候，記起紀勤曾經落過嘅賭注，於是想睇吓紀勤以咩成績跑完全程，但係絲絲搵唔到紀勤嘅名，可能佢用咗另外一個別名以低調嘅方式參加賽事都唔定，又或者紀勤都幾勤力減肥，最後無參加馬拉松嘅需要。
余詩韻