市場熱線：中煤隨時會突破

國際大事似乎去得八八九九，歐盟、豬20、意粉國同希臘都已傾到差唔多，孖屐有樂觀派、有悲觀派，但認為「花花公子」總理落台就可令意粉國化危為安未免過於樂觀。而最令人期待嘅消息係祖國會唔會減存款準備金率，雖然係一廂情願居多，但A股呢排走勢明顯轉好，總之通脹回落就萬事好商量，加電費單嘢愈講愈似層層。

市靜唔代表冇股炒

減RRR、加電費、成品油定價機制改革傳完又傳，但保險股尋日異軍突起，中保監話要完善業界資本補充制度，即係方便佢哋境外發債。其餘電力股、汽車股、鐵路股、內房股、煤炭股、環保股都夠晒搶眼，個市靜唔代表冇嘢炒。

比亞迪（01211）狂炒上20蚊關口，因為祖國推出新能源汽車推廣試點，喺發牌、停車場、電費、路費都有優惠，最緊要係叉電站要滿足需求，但環保車好似未見高潮已失熱潮。另外幾隻車股亦幾醒神，雖然話十月賣車升幅放緩，但因為九月大賣有一節淡三墟效應，銷售成績其實已算滿意。

中國燃氣（00384）都算怪股，聯合國咁大嘅股東陣容，仲話有投資者想買「較大」股權，係發新股定有股東賣舊股？總之又將會七國咁亂。其實燃氣屬於國家重要戰略資產，應該由一間有國企背景嘅公司揸旗至啱，但股東之一嘅中石化（00386）只係行行企企，不過古勝認為所謂博亂係有亂先有得博，前排嘅國美（00493）、依家嘅中燃都可以乘亂短炒。

資源股一直同魚缸嘅關連值甚高，尋日煤炭股同個別鋼鐵股跑出，煤炭股升得較有道理，除咗入冬買煤炭股嘅傳統智慧之外，國際油價直逼100蚊美金大關，作為最大替代品嘅煤炭亦會被帶動價格。

而最重要嘅因素係，加電費單嘢好似就快拍板，祖國以限電價方式壓通脹已證實行唔通，因為換來後果係鬧電荒；而阿爺今年曾試過限煤價，結果仍係冇結果。趁依家通脹回落加電費效果最直接，當電費加咗，煤價嘅壓力亦會鬆綁。

改變策略表現標青

三大煤炭股通常以兗煤（01171）最好炒，但第三季成績表派咗之後排名有變，兗煤、神華（01088）同中煤（01898）分別倒退70%、增長25%同增長65%，所以中煤呢排走勢反而較為標青。

中煤過往同神華一樣係賣合約煤為主，但自從阿爺玩限價之後，中煤改變策略賣現貨煤更多，煤價短線升幅對其受惠程度更大。中煤亦有經營採煤設備，今年國際煤機（01683）同年代煤機（08043）先後被高溢價收購，煤炭行業其實被低估。

雖然話依家大勢係減炭排放，但可透過技術進步去解決，煤炭價格一直以來係升多跌少。中煤估值已唔再係三隻煤股當中包尾，走勢醞釀突破，計13倍預測PE同神華睇齊可值11.6元。

古勝