受到一堆堆調控政策嘅打擊，加上國務院又講到明，唔會放寬對內房嘅調控，內房股嘅冬天都唔知幾時完，好似近期新聞多多嘅綠城中國（03900），早兩日喺微博上面，就傳出佢哋要申請破產嘅消息，搞到董事長宋衛平即時喺凌晨撰文澄清，仲非常時髦咁話呢個係一個「冷幽默」，再派定心丸畀大家，話綠城離破產仲有很遠嘅一段距離，叫大家唔使咁擔心喎!
絲絲尋日喺綠城網頁上面睇到宋衛平嘅澄清全文，行文間見佢對傳聞嘅無奈，但佢話，依家嘅調控環境係整個內房行業嘅問題，量價齊跌，市場萎縮，積壓大量庫存，中小房地產商岌岌可危，佢相信再過一段時間，恐怕就真係有好多房地產商要面臨倒閉。
不過市場改變唔到，宋衛平認為佢哋可以做嘅，就係喺目前市場條件下搵條生路嚟穿越寒冬，一方面努力賣樓，另一方面就賣部分項目股權以解決資金問題。佢覺得呢次調控期間，綠城就好似變咗其他人眼中嘅風向標，佢願意將呢啲傳言當成大眾對綠城嘅關注同愛護，所以發文感謝各位喇！
余詩韻