市場熱線：中海石化等機會突破

傳聞已申請破產保護嘅期貨交易商明富環球（MF Global）有客戶現金去向未明，加上花旗國最新經濟數據遜預期，隔晚歐洲同花旗魚缸繼續插水。前日恒指唔見四舊幾，某程度已率先反映外圍淡風，尋日上晝如期低開，但萬九點邊現承接，表現比想像中強，午後A股回勇，滬綜指終於突破2,500點，收報2,504點，升1.3%，好友乘勢反攻，恒指轉跌為升，追回前日大部分失地，收報19,733點，升363點，成交742億元，全日高低波幅達721點。

A股強有利紅色分子

港股單日轉向叫人眼前一亮，短線恒指已成功考驗萬九點支持，10日線（19,149點）確認升穿50日線（18,901點），只要外圍G20峰會及聯儲局消息對辦，相信多咗人願意入場追貨，兩萬點關將再現好淡爭持局面。

呢期A股偏強，同市場憧憬末季銀根鬆動有關。內地傳媒報道，截至上周四，建、農、中、工四大行十月新增貸規模約為1,400多億元（人仔‧下同），其中十月廿一至廿七日五個工作日新增信貸突然急增逾600億元，與「微調」論不謀而合。唔排除今年新增貸款會略高於原先估計嘅7萬億元，即係話十一及十二月新增貸款合計可能達到1.3萬億元以上。市場流動性有改善，炒家出動搲銀過年，但內房冇得炒，惟有湧入金魚缸！

咁講法今年尚餘唔到四十個交易日，食粥食飯睇祖國，本地中資股又似乎唔衰得晒，尋日內銀就嚟一次似樣嘅反撲，重農行（03618）彈7.9%，招行（03968）、交行（03328）、工行（01398）及中信行（00998）升幅均4%，若然小旗形走勢成立，短線將會抽穿上周五高位。

扶農力度唔會減弱

市傳發改委將於周內召開關於淘汰白熾燈嘅新聞發布會，刺激LED股表現，雷士照明（02222）升逾3%、AV CONCEPT（00595）升12%，反觀真明麗（01868）原地踏步，可以望多兩眼。此外，財政部定明年首批農機購置補貼金額同比增長約24%，專做農業機械嘅一拖（00038）立即醒神晒，股價急升近一成，以全日高位7.5元（港元‧下同）收市，料試7.8至8元阻力位先會回頭。

無論銀根鬆定緊，阿爺對農業嘅支持有增無減，農業股只要經營得法，前景樂觀。今年內地糧食增產順利，化肥業龍頭中海石油化學（03983）中期業績理想，相信全年度成績表唔會失拖。

十月下旬中海石化股價由低位5.15元抽上6.5元遇阻，皆因呢個位係今年二月高位7.17元延伸嘅下降通道頂部，但見尋日落到接近10日線便止跌，並回升至6.2元收場，短線整固完成後可以再次衝頂，一旦成功突破的話，有勢挑戰今年高位。

古勝