正所謂生意淡薄，不如賭博，投行都興呢家嘢，話說絲絲尋日收證券行報告，居然收到麥格理寫嘅馬經，而且仲好鬼準，貼中第一名添！
大家無睇錯，澳洲大行麥格理星期一出咗份墨爾本盃馬經（研究報告），寫馬經嘅係澳洲麥記嘅分析員，列晒數據同埋走勢圖，又話澳元高企，吸引咗大批外國靚馬飛到墨爾本參賽贏澳紙，報告貼「多利得」第一、本港代表兼上年冠軍「美利堅」就排第三。
其實墨爾本盃對澳洲人嚟講係一大盛事，今年已經係第151屆，依家香港有最多澳洲「賓卡」員工嘅，就係麥格理同里昂，有啲澳洲幫見近排個市咁淡，本來想請假返老家度假兼睇賽事，點知遇上澳航罷工取消，絲絲幾個賓卡老友尋日十二點中午收市，就走到交易盤房，望住近百吋嘅大電視睇賽事直播，部分都私下開盤口，聽講有人贏咗收工請同事去蘭桂坊Happy Hour添。
寫馬經嘅呢位分析員係CFA，用到專業嘅定量分析，結果真係畀佢貼中第一，「美利堅」就得梗頸四，如果其他股票分析都有咁準，你話幾好呢？
余詩韻