順叔：「啱啱掃咗隻熊仔，跟住個市就係咁挾，想沽嗰陣，點知個莊就熄咗燈，搞咩鬼？」
經紀陳：「唔係熄咗燈，係隻熊仔打咗靶。」
以上節錄自一段經紀行的對話，亦係近期經紀行聽得最多的，字裏行間充滿不同的股票和投資術語。
先講「熊仔」，熊仔意思是指熊證，而牛證一般人稱之為「牛仔」。一般而言，買得牛證都係睇好後市；相反，對後市唔多樂觀，自然買熊證。著名的紐約華爾街放置一隻銅牛雕像，寓意牛市，代表大家都希望升市有錢賺。至於點解牛市代表升市，熊市代表跌市？有講法話係，因為牛的眼睛向上望，熊的眼睛向下望。
此外，大家有時或者會聽到，有人講「掃」了幾多股票，講的其實是指直接買入幾多股票，「掃」，以較高價位直接買入的意思，唔排隊。相反，「隊」就是指，投資者直接以買入價沽貨，以較低價位賣給正在排隊想買貨的人。至於排隊，即表示不願意在價格上讓步，想用較低價買入，所以將買盤「排」在現價以下，希望有人急於沽貨，不計價位，將股票「隊」給自己。總而言之，「掃」及「隊」即代表投資者採取主動，而「排隊」則是被動。
「熄燈」，原意指股票本來買賣掛盤充足，但一下子買賣盤同時消失。熄燈者，意即有貨未能脫手，如在一間光猛房間裏，突然漆黑一片，伸手不見五指，非常無助。牛熊證有「強制收回」機制，當正股或指數觸及收回價，就立即停止買賣，投資者的持貨將立刻被收回，然後作出結算，通常要等到收市後或翌日才知道剩餘價值，有人如果無留意到牛熊證已觸及收回價，就會好似以上仁兄咁誤以為莊家熄燈。
上面所講的牛熊證「強制收回」機制，俗稱「打靶」，包含突然死亡同無得翻生的意思，當正股或指數觸及收回價，牛仔或熊仔會立即停止買賣，然後莊家就會同你計數，畀番剩餘價值持貨的投資者。叫得做打靶，代表收回帳面多數有所虧損。以往財經記者多用「突然死亡」或「打靶」代表強制收回，但近日唔少報章都創出更多更生動的詞語，例如「屠牛」、「殺熊」等。
除了本地術語，要睇明內地的財經報章，亦要多認識內地的財經詞彙，因為兩地報章所用的詞語有相當大的分別。例如，對大市的睇法，我們所講的睇好，內地報章稱之為「看多」，而「看空」即是我們所講的睇淡，意即看跌。至於成交量，內地報章也自成一套，表達得更加生動，上星期五港股成交破千億，用內地術語，即是大市成交創出天量，意即大成交，而「地量」即表示成交量很低。另我們所講的「撈底」，內地叫「抄底」。
作者簡介：昔日名主播，如今已從電視台財經頻道走進金融世界，現職渣打銀行認股證銷售副董事。
林燕玲