市場熱線：聯想跌穿5蚊先諗

希臘搞公投，令稍為平息嘅歐債危機又再死灰復燃，意大利十年國債孳息升至6.17厘，比德國國債息1.85厘，息差創紀錄新高，可見債商正拋售「歐豬」債買入安全性較高的德債，向歐洲金融穩定基金（EFSF）投下不信任票。儘管市場仍期望周四、五的G20峰會有解救方案，但勸看官仲係打定輸數比較好。

至於花旗國，期貨交易商明富環球（MF Global）申請破產保護，查實呢單嘢孖屐早作預期，但都要拖累道指隔晚跌兩百幾點收場，皆因傳聞明富帳目出問題，會唔會禍及交易對手，尚屬未知數。

中資股牛氣消失

祖國十月份製造業PMI為50.4，按月回落0.8點，同孖屐估計嘅51.8有距離，結束連續兩個月嘅升勢，亦係○九年二月以來最低，可幸係繼續企喺50樓上。如今睇嚟，近日溫總出手打「微調」牌，相信正係預計末季經濟增長下滑風險增加，上大人既已做好防範，故見尋日祖國魚缸未受影響，滬綜指靠穩，埋單升1.7點，收報2,470點。

反觀本地魚缸就兩個樣，一如古勝所言，上周五好友真係鳴金收兵，尋日恒指低開逾400點，中午跌幅一度收窄至兩百多點，但下晝又再插過，中資股牛氣消失，內地官方傳媒報道溫爺爺強調繼續落實調控樓市言論，加上萬科喺多個城市減價促銷樓盤，珠海市突然發出緊急通知執行「雙限令」，內房股繼續被倒吊，中國海外（00688）跌逾6%，季度房貸減值準備計提增加嘅招行（03968）仲未識止跌，再插7.7%。A股收市後淡友冇後顧之憂繼續做嘢，恒指尾市踩到落全日低位19,322點，收報19,369點，跌494點，成交671億元。

中移表現夠個性

升市跌、跌市升嘅祖國移動（00941）本性未改，恒指唔見幾百點，偏偏佢就穩如泰山，逆市倒升0.6%收市，報75.1元，話佢係「恒指Put輪」真係冇花假！

歐美金融業再傳利淡消息，大笨象（00005）股價回補咗上周五嘅上升裂口位，收報67.2元，跌3.8%，短線10日線支持喺66元，穿呢個位就要試番64元承接。

嚟緊缸邊友焦點放喺G20領導人第六次峰會以及聯儲局會議結果，正在訪問奧地利嘅胡主席將會飛往法蘭西康城出席G20峰會，睇下到時對援歐有咩建議，至於花旗國會唔會有QE3，冇希望自然唔會有失望！

眨眼恒指由高位落番近千點，短線下試50日（18,894點）及10日線（19,007點）支持機會大，守得住嘅話，可以睇番啲實力股表現。第三季聯想集團（00992）砌低戴爾成為全球PC二哥，市佔率同比升3.3個百分點，形勢大好。

PC發展優於對手

雖然同全球PC一哥惠普（HP）嘅市佔率（18.1%）比較尚有距離，但呢半年惠普就是否出售利潤微薄嘅PC業務舉棋不定，最近又傳出放棄出售，搞來搞去到頭來阻礙發展，即使繼續做落去，亦未見有改善利潤嘅新招。

反觀聯想喺祖國嘅大後盾支持下，繼續衝前，今日公司將宣布中績，尋日股價逆市企穩預視報佳音，但撞啱市況轉弱，若股價現好消息出貨，可以留意5元邊或樓下有冇執平貨機會。

古勝