提起微博，自然不得不提內地網民喺三大微博平台悼念蘋果「教主」喬布斯嘅熱情，兩天流量竟然高達2.3億次，唔少企業就睇中微博嘅營銷推廣威力，兼具成本低、瞬間高效宣傳嘅優點，近年唔少企業推廣潮人潮物，都喜歡利用呢類網上平台。
近日新地（00016）為推廣屯門旗下新商場V City，專程喺微博開Blog，實行瞄準內地同新界西嘅年輕消費群。
V City嘅「V」係指VIVA「歡呼」，個名夠young，但係要吸引有品味嘅時尚年輕人「型」聚該個新蒲點，新地自然要搞多啲新意思，除咗微博外，新地亦喺Facebook開專頁，介紹吓潮流消費訊息，新地亦計劃同目標商戶合作，推出獨有產品於V City店舖內限量發售。