絲絲同招商證券香港衍生產品部市場銷售主管朱紅（Niki）傾過偈，佢就話發輪計劃進行得如火如荼，就算個市差都影響唔到佢準備，雖然未落實推出產品嘅時間表，但呢個依然係證券行嘅大方向，唔會因為一時三刻嘅市況改變。咁又係，個市唔係升就係跌o架啦，見Niki咁積極籌備，絲絲都好戥佢開心。
海通嫌發輪成本貴
輪場熱辣辣，內地人係主力參與者，不過絲絲索到料，之前有意進身為輪商嘅海通國際（00665），雖然長遠係有咁嘅計劃，但一切只係研究階段，而且覺得成本貴，所以暫時都係專注發展番企業性業務、資產管理業務等，睇個勢短期唔會有輪出。
至於國泰君安之前都有話過想下半年出輪，仲話已經完全符合證監會對輪商嘅要求。