今晚班中小經紀會同政府見面表達多項訴求，其中證券及期貨專業總會會長王國安坦言對會面冇期望，開會前佢同政府求咗支籤，竟然係諸葛神數第140籤，籤詩是「遇不遇，逢不逢，月沉海底，人在夢中。」
絲絲立即翻查呢支籤嘅解讀，其中一個解籤係：「所問諸事均在虛無飄渺中」。唔通連支籤都暗寸政府對業界現時所面對嘅問題「人在夢中」？
王國安同絲絲呻，業界提出好多關乎金融市場安全嘅問題，但都得不到積極回應。好似輪商要有股票才可發行窩輪，該會於○六年已提出，但過咗咁多年，仍然係「得個桔」。依家港交所（00388）提出叫輪商研究提供抵押品嘅可行性，輪商就話技術上唔可行。
王國安想反問吓，以前都試過咁做，點解依家唔得？事實上，外國都有例子證明係做到。至於輪商話抵押品價值變動好快、同點樣計算等，都令技術上出現困難，佢就更加反感，話就係因為現貨波動大，才有衍生工具推出，畀市場對沖風險，減低波動，輪商依家咁講豈非係「自打嘴巴」？
王國安好想政府清楚話畀業界聽，依家香港想要嘅係賭博定係投資市場先？