全球汽車業「一哥」寶座，過去咁多年一直係日本豐田同美國通用汽車（GM）嘅雙雄之爭。不過，呢個悶局今年有望畀來自德國嘅福士打破。多家具領導地位嘅汽車業顧問機構一致睇好福士今年會跑出，取代豐田升格做以銷量和產量計嘅業界「一哥」。
仲記得福士行政總裁溫特科恩曾誇下海口，要喺一八年之前打低豐田，好多人都當佢「發噏風」，因當時豐田嘅汽車銷量拋離福士幾個「身位」。不過，福士近年增長強勁，加上豐田喺日本大地震後備受供應鏈問題困擾，令福士有望較預期提早七年達標。
福士近期氣勢如虹，唔單止喺中國銷情暢旺，就連喺經濟虛弱嘅歐洲市場仍能保住高增長，五年前仍受到高工資和管理層內訌打擊嘅福士，可謂一吐烏氣。其實，單睇福士旗下品牌眾多，由低價嘅Skoda到高價嘅賓利都有，喺規模經濟方面佔盡優勢。
單喺今年上半年，福士已經售出破紀錄嘅400萬輛汽車。其中一家睇好福士跑贏嘅業界顧問機構JD Power預期，福士全年汽車銷量將達780萬輛，佔全球汽車市場10.5%，打抵屈居第二位、汽車銷量料為720萬輛嘅GM，豐田僅排名第四，汽車銷量料為670萬輛，不敵第三位嘅雷諾和日產合營公司。