好多人都知巴菲特節檢樸素，但究竟有幾樸素？佢個仔細個時每日嘅零用錢係兩美元，要到廿歲至知老竇係「富爸爸」。彼得‧巴菲特（Peter Buffett）同股神老竇巴菲特行嘅路南轅北轍，阿仔依家係音樂人。佢近排去咗中國大陸，同大學生分享創作音樂嘅經驗，順便幫自己嘅新書《Life Is What You Make It》嘅中文版《做你自己》宣傳。
股神之前為咗搵接班人而頭痛，點解呢位囝囝唔繼承衣鉢呢？原因非常簡單，因為根本冇興趣，學喬布斯話齋要「率性而為」。彼得話自己入讀史丹福大學（據傳巴菲特託友人推薦）三個學期，就決定退學改行玩音樂，但唔好以為這位「富二代」只係玩玩吓，事關佢除咗曾參與電影《與狼共舞》嘅配樂工作外更曾經獲《艾美獎》，在電視及電影配樂工作上獲一定成就。
巴菲特雖貴為「股神」，彼得都係近廿歲才知自己有個「富爸爸」，事關細個時爸爸每日只畀兩美金零用錢、五歲遷居後就未試過搬大屋、爸爸仲日日自己開車返工，就算家姐填表寫父親職業是「Security Analyst」（證券分析員），同學卻以為係「保安系統檢查員」，根本就唔知爸爸係從事證券投資，更加唔知佢副身家咁厚！