「廉署剋星」林炳昌，同無縫綠色（08150）嘅董事局內訌咗幾個月，最終被叮走，點知轉個頭佢就去咗另一間上市公司做獨立非執董。
金源米業（00677） 尋日公布，委任林炳昌做獨立非執行董事、審核委員會成員及薪酬委員會成員，尋日開始生效。金源照例介紹吓佢嘅背景：60歲、香港知名律師、香港林炳昌律師事務所創辦人兼合夥人，而且仲好坦白話畀股東知，佢曾經係無縫綠色嘅執行董事及主席，今個月二十日被罷免執行董事職務。由被罷免至獲另一家公司委任，相差只有八日，效率真高。
林炳昌將收取酬金為每年十萬元，又係老規矩啦，酬金係根據其職務及職責、公司業績、業內標準及市場情況而釐定。
睇番林炳昌，雖然喺無縫綠色嘅時間唔長，但過程就峰迴路轉，公司舊年十一月底至委任佢做主席兼執董，今年八月就上演內訌惡鬥，首先林用四成折讓價向公司提出全面收購，跟住就有人要求罷免林嘅董事職務，結果係林敗陣，喺股東會以大比數被踢走。
余絲韻