微軟除咗有個令人仰慕嘅蓋茨之外，其實佢個行政總裁保曼（Steve Ballmer）都有唔少粉絲，好似佢○六年曾經喺香港一個午餐會演講，都吸引咗唔少人捧場。不過近年微軟戰鬥力大減，有個博客就爆料話，唔少員工都對呢位CEO有所不滿。
呢個博客叫做「迷你微軟」，由一位匿名嘅微軟員工創立，專爆公司嘅內部變動。網站最近就出現咗一篇文章，話最近喺微軟嘅年會，參與嘅員工已經唔係多，當保曼上台進行主題演講，佢一半都未講完，竟然有員工聯群結隊咁拉隊走人，擺明向CEO示威。
微軟每年都會搞個大會，主要係為咗鼓勵員工士氣。有員工就留言話，回顧以前蓋茨演講時，會上所有人都全神貫注，對比保曼嘅演講場面，就令人傷心。
絲絲喺另一美國企業員工網站上睇到一項統計，喺1,691位微軟員工之中，有過半數人都對呢位CEO不滿，睇嚟保曼嘅CEO之路將會愈嚟愈難行。
呢件事亦令到絲絲諗起近排好多新聞嘅蘋果公司，佢哋嘅靈魂人物喬布斯，每次演講都吸引到千千萬萬嘅粉絲同埋員工嘅眼珠。喬布斯嘅接任人庫克，會唔會少咗一啲魅力呢？好快就會知。
余絲韻