胡潤尋日公布咗《2011胡潤女富豪榜》同埋《2011胡潤全球白手起家女富豪榜》，中國女首富嘅寶座亦換咗人坐。
去年排頭位嘅係玖龍紙業（02689）董事長張茵，今年跌落第四，取代佢嘅係龍湖地產（00960）掌門人吳亞軍，佢亦係全球白手興家女富豪之首，即係話佢兩個榜都攞冠軍啦。
根據胡潤嘅統計，吳亞軍嘅身家有420億元（人民幣‧下同），比喺中國十大女富豪中，唯一唔係白手興家嘅碧桂園（02007）太子女楊惠妍多60億，而陳麗華就蟬聯第三，財富有330億元。
睇番份榜單，就會發現內地嘅女富豪年輕、又多金。今年有156人登上百富榜1,000人榜單，佔15.5%，係歷年最多。而頭50名上榜女富豪嘅平均財富有97億，比兩年前多咗47%，升幅亦係歷年最大嘅，當中14人嘅身家超過100億。佢哋平均只係48歲，比百富榜仲要細3歲，至於主要財富來源係房地產。
最特別嘅係，全球28名擁有10億美金嘅白手興家女富豪中，18人係「國產」。頭5名除咗Zara嘅創始人Rosalia Mera之外，全部係中國女富豪。唔知呢個成績會唔會嚇親啲男士呢？
余絲韻