市場熱線：大光燈有排冇運行

近期特色，係來自歐洲的金融消息，即使唔太差都被視作好消息看待，乜乜歐洲銀行行長願意同歐洲央行坐低傾傾，居然都被看成希臘獲救一樣，但只怕大家最後只是一廂情願。

現時希臘公共債務等於全國GDP嘅1.6倍，即使全民唔使唔食唔用幫國家做奴隸，都有排還，即使要去番《馬城條約》六成上限，都需要長達25年時間，幾乎肯定，違約或者有限度違約會喺不久嘅日子內發生，好彩係希臘佔整個歐盟區經濟權重僅2至3%，即使爆也不代表世界末日，只要唔好搞到火燒連環船就得，可是今日金融市場信心脆弱程度，等於要在煙花廠BBQ唔引發大爆炸一樣困難，點樣可以將天文數字的「歐豬」毒債解毒，再以ECB擔保放出街，其難度及複雜程度，根本就係「Mission Impossible」。

國美搞副業遭懲戒

德國今日會表決係唔係擴大EFSF，4,400億歐元透過槓桿化可以變2萬億歐元，到時一天都光晒，但想像美好、現實殘酷，德國制唔制卻成疑問，因為一旦出事，德國要孭飛。而歐豬見有條大水喉射住，可能罔顧道德風險，古勝仍係嗰句：針冇兩頭利。

上海地鐵出事，諗住鐵路相關股死硬，但走勢令人跌眼鏡，結果得南車（01766）一隻跌，其他全部倒升包括佢個仔南車時代（03898）、曾創新低嘅中鐵（00390），中鐵建（01186）同中交建（01800）更分別大升7.7%同8.2%。鐵路股點解不跌反升不得而知，話趁壞消息入貨好似好牽強，因為唔知將來仲有冇大鑊嘢發生，祖國鐵路訊號系統咁化學，乘客唔驚就假，新鐵路建設亦幾乎停頓。

國美（00493）不務正業搞房地產，結果股價應聲跌11%，呢類搞副業嘅公司一向被列入不受市場歡迎類別，何況房地產更係高風險。如果新業務同本業有關則係例外，好似QQ（00700）進軍網購行業就反應幾好，股價亦升3.4%，QQ勝在有幾億用戶平台，做網購咪話冇得同淘寶拗手瓜。

尋日二三線股冇受大市下跌影響，弱勢股繼續死貓彈，思捷（00330）有大行出報告話有可能畀私募基金趁低買起，呢樣純粹係假設性問題，如果股價低殘就有機會被收購或私有化，咁樣大把公司夠資格。思捷嘅主要問題唔係賺少98%，而係未來要用180億元重整業務，試問邊個夠膽孭起？

市底弱新股博唔過

最近三隻新股全部破底，尋日上嘅動感（01096）低招股價1仙，連嘜價都費事。今日細細粒嘅專業旅運（01235）暗盤做好，純粹係炒供求，做旅行社嘅公司記憶所及冇乜邊隻掂；同樣地，證券股上市亦冇乜邊隻益街坊，所以中信證券（06030）傳以下限定價亦博唔過。

證券股係睇成交，依家祖國魚缸成交得1,000億人仔左右，滬綜指尋日再跌破2,400點關，仍係反覆尋底格局。古勝成日話民間大耳窿盛行，仲邊有人炒股炒樓？所以揸住光大證券嘅大光燈（00165）股價跌到咁殘亦升唔起，旗下光大銀行想來港上市揀唔啱時辰，淨睇其他內地錢莊股價就知上到都唔慌好。

除非祖國魚缸突然翻生，否則大光燈恐怕有排冇運行，博反彈都揀第二隻。古勝周初講隻中糧（00606）受惠於黑心油事件，呢兩日嘅反彈力度幾強勁。寶姿（00589）尋日公布第三季零售銷售激增35%，鉑陽（00566）勁升幾日之後停牌待公布關連交易，可惜呢類股唔係個個敢買。

古勝