家陣無論住宅同商業樓嘅租金都貴到飛起，做大業主真係笑呵呵，原來除咗勁收租金外，大業主仲有另一好處，就係快人一步率先睇潮嘢，絲絲講緊嘅，係蘋果公司租用中環國際金融中心（IFC）商場，周六隆重開幕嘅香港旗艦店，商場大業主恒地（00012）同新地（00016）嘅管理層尋日去咗旗艦店參觀。
ｐ：大業主高層率先觀摩
香港咁多潮人，都預咗開張當日一定逼爆。佢哋首間喺香港嘅旗艦店佔用兩層。尋日中午食晏時間，絲絲路經該舖，見到原先包住櫥窗嘅阻擋物「一掃而空」，通透嘅玻璃將舖內所有陳設「露晒底」，絲絲猛咁(目及)，睇到有一條全落地嘅玻璃旋轉梯可直達樓上。
唔淨只係絲絲，一班西裝友和OL都猛用手機不斷在門外拍低舖頭嘅情況，唔知仲以為佢哋提早營業。據聞蘋果公司尋日大開中門，係為咗招呼商場大業主恒地同新地嘅管理層，安排佢哋尋日朝早率先參觀，之後舖面或會重新「遮番埋」，等待正式開業時才展現人前。
郭老太都到場參觀？
絲絲老友仲話，喺蘋果公司樓上嘅利苑酒家，巧遇年底退休嘅新地主席郭老太郭鄺肖卿，同一班後生仔食午飯，唔通郭老太陪一眾孫兒「朝聖」完，響佢最鍾意嘅飯堂之一歎茶？
余絲韻