今年係鴻興印刷（00450）創辦60周年，任氏家族喺本月初又正式重登其印刷王國嘅第一大股東寶座，由任澤明做番公司話事人，總算係重振任家威名，難怪任澤明喺最新年報致詞表現得感慨萬分。
不過最令呢位新掌門人神傷嘅係，佢老父任昌洪喺年內與世長辭，佢喺重掌話事權後嘅首份主席報告中，就引用先父生前嘅口頭禪自我激勵，仲話希望先父呢種目光遠大嘅精神長存不息。
任昌洪一句「吃不窮，穿不窮，不會打算一世窮」，被奉為鴻興今時今日成就嘅經營理念及智慧，尤其傳神，甚至可以話係鴻興呢3年嘅精神寫照。
自○八年炒燶金融衍生工具，焗住由外姓人「紅籌之父」梁伯韜嘅私募基金CVC入主鴻興做大股東後，任氏後人就咬緊牙關，直至今年四月，CVC轉讓29.91%股權畀日本造紙及包裝物料製造商聯合株式會社，任澤明獲提升為公司最高領導人。
任澤明坐正鴻興主席之位，佢先父泉下有知，都應該會大感安慰，兼且保祐CVC揸住嘅剩餘鴻興股份搵嚟好買家，帶挈鴻興行番個靚運。
余絲韻