孖妹缸湖遊：黃金投資多面睇

耀才證券分析員 李惠嫻 金礦股揸唔過

孖妹：你點睇金價走勢？依家本港3隻金礦股招金（01818）、紫金（02899）及瑞金（00246）又買唔買得過呢？

　李： 金價喺年底前都會處於大漲小回格局，支持位係每安士1,600美元，高位有望見1,800美元，其實技術上金價已經超買，但近期多國央行不斷增加黃金儲備，韓國更係13年以來首次增持黃金，無疑可支持金價企穩。

耀才證券分析員 李惠嫻

法巴上市衍生產品部聯席董事 趙海珠

另外，最近美國經濟數據未如理想，失業率高達9%以上，我估計喺本月底前，美國推出QE3嘅機會好大，量化寬鬆政策會利淡美元走勢，屆時金價會再被推高，同時歐債危機未解決，亦令投資者避險情緒高漲，眾多原因造就金價攀升。

創盛理財董事 陳寶琪

敦沛金業高級副總裁 孫裕生

雖然我認為應該買金，但就唔建議買入金礦股，因為金礦股走勢唔算緊貼金價，亦受大市氣氛影響，好似早前紫金發生滲漏污染事件，引發一連串訴訟及索償，可見管理礦區質素仍有待改善；至於瑞金因為管理層及公司帳目有問題，至今仍然停牌；反而招金有90%收入及利潤來自黃金相關業務，可算係3隻金礦股中嘅最佳選擇。不過如果想投資黃金，其實買黃金ETF（交易所買賣基金）仲好。

法巴上市衍生產品部聯席董事 趙海珠 黃金窩輪小博大

孖妹： 既然金礦股唔係太好炒，咁不如我哋試吓買黃金窩輪。睇番資料，由上月二十二日至本月四日止嘅10個交易日，窩輪市場共有102萬元淨流入黃金Put輪，另有69萬元淨流入黃金Call輪，可見散戶唔係一味睇好金價！

趙：早前金價連升多日，市場資金開始流入黃金窩輪，近期我亦收到唔少散戶詢問黃金窩輪嘅玩法及計價方法。市場上現有7隻黃金Call輪以及5隻黃金Put輪畀散戶選擇，但其中有兩隻Call輪已經唔值錢喇。依家好多黃金窩輪嘅槓桿都有8倍以上，敏感度都幾高，如果散戶對金價有睇法，不妨考慮投資與黃金相關產品。黃金窩輪嘅玩法與一般窩輪冇乜分別，但其價格變動係參考最活躍月份嘅紐約期金，若散戶持有黃金窩輪至到期，結算價就會參考倫敦金喺到期當日嘅上午定價。

創盛理財董事 陳寶琪 黃金ETF可考慮

孖妹：投資黃金窩輪可以「刀仔鋸大樹」，確係唔錯嘅選擇，不過若講到百分百跟貼金價走勢，咁就要買黃金ETF喇！

　陳： 依家市場上有兩隻黃金ETF畀散戶參考，分別係SPDR金ETF（02840）及價值黃金ETF（03081），不過由於本港黃金ETF成交唔算活躍，散戶來來去去都係炒嗰幾隻，所以你哋買ETF時一定要睇成交量，以免「買貨易、沽貨難」。其實近期歐美債務問題愈見嚴重，美國大有可能再推出QE3，所以我都睇好未來兩年金價可穩步上揚，建議散戶將黃金加入投資組合，不過投資比例就不宜超過20%。我覺得SPDR金ETF係唔錯嘅選擇，因為其價格較為跟貼金價走勢，買賣ETF嘅手續費唔高，又免政府印花稅，交易成本平過買金礦股，不過就要收取管理費用。

敦沛金業高級副總裁 孫裕生 黃金孖展須訂賺蝕

孖妹： 我哋對黃金孖展唔係太熟，一講到孖展，風險好似好大，所以投資前都係知清楚穩陣啲！

　孫： 黃金孖展即係買入或沽出國際黃金合約，唔會有實際黃金交收，每安士金價會以美元報價，具有槓桿效應，所以會有較大嘅投資風險，但散戶亦可預先設置止賺及止蝕位。其實每年下半年黃金需求都會明顯增長，七、八月金價多數會行單邊市，高位通常會喺十一、十二月出現。我認為散戶依家可投資黃金相關產品，未來歐美問題會持續，加上各國央行仍會增加黃金儲備，所以我都睇好金價表現，支持位約為每安士1,600美元，今年高位可上望1,800美元。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk