港交所（00388）早排有唔少高層離職，絲絲聽聞，港交所員工流失至今仍未停止，並且蔓延到中層。繼上市推廣部總監李晞禔被新加坡交易所「挖角」後，有傳上市科負責政策方面嘅總監Anne Chapman最近亦已辭職，稍後將會隨家人返回老家新西蘭。
絲絲收到風，Anne Chapman今次唔係過檔，只係與丈夫及孩子返回老家，佢大約會喺十月離開港交所。
至於李晞禔，新加坡交易所日前宣布任命佢為高級副總裁兼上市部中國業務主任，主要職責係拓展中國企業上市業務。唔講唔知，李晞禔原來係新加坡人，今次過檔都算係返老家工作。喺○○年加入港交所嘅佢已度過Last day，但由於要「過冷河」，十一月先會喺星交所返新工。
雖然港交所員工流失未停止，但同時亦不斷有新面孔加入，所以應該唔會對港交所運作有影響。
余絲韻