喺柬埔寨生產橡膠嘅兆業資源將來港上市，近排有傳會喺本月底進行上市聆訊，保薦人係招銀國際。絲絲一向覺得柬埔寨幾神秘，有個靚仔「芬佬」朋友話，佢早前參觀過兆業資源嘅橡膠林，印象難忘，仲畀咗一張公司主席與家人食飯時嘅獨家偷拍相片畀絲絲。
靚仔「芬佬」爆料話，佢與成班基金界組團去柬埔寨睇個橡膠林，地點好偏遠，即使佢哋住當地最好嘅酒店，但房內都竟然有蜘蛛鹽蛇爬上頭，樹林內溫暖潮濕，原始風味唔在講，不過最緊要係參觀過後，證明咗呢個橡膠林係堅嘅，範圍仲差唔多有成個香港咁大，咁就唔使驚好似嘉漢林業咁畀人質疑林地面積啦。
至於佢交畀絲絲嘅偷拍照，大家可以先睹為快，相中左邊嗰位係兆業資源主席馬木英，佢係香港人，○六年毅然去咗當地種橡膠，作為做鞋底及車胎嘅主要原料，佢又幫當地鋪路通水駁電，所以獲政府支持。至於相中右邊嗰兩位，分別係馬木英嘅公子黃淳遠（兆業資源CEO）以及佢太太陳詩敏，而原來陳詩敏係通達集團（00698）嘅財務總裁，會計出身，可以幫老公睇實公司盤數，係一位賢內助。
余絲韻