絲絲講場：大新金融黃漢興 電影比喻吸人才
大新金融（00440）行政總裁黃漢興（Derek）原來一向有留意電影，大新人壽嘅招募及培訓中心喺尋日揭幕，佢就用電影《建國大業》嚟比喻吸納人才嘅重要性。
Derek話金融服務業最着重嘅應該係人才，有人才先可以建立長遠嘅發展基礎，就好似電影入面嘅兩個黨咁，一個掛住攻城掠地，另一個就着力吸納人才拉攏民心，所以最終都係「重人」嘅後者可以一統全國。話說回來，《建國大業》嘅姊妹作《建黨偉業》早前先至上畫，唔知Derek睇完後有乜感想？
王祖興：冇計劃裁員
人才除咗要招募及培訓外，亦需要挽留，大新銀行（02356）行政總裁王祖興就大派定心丸，話佢哋嘅業務發展順利，目前冇計劃裁減員工，反而會繼續招聘人手。據知大新人壽就計劃喺年底前增聘150位前線員工。
大新對新培訓中心非常重視，除咗一眾管理層出席開幕儀式外，就連久未露面嘅大新金融集團主席王守業亦有出席。據講呢個中心花咗超過100萬元裝修，取名為大新聚賢堂，有「真誠則善廣，善廣則聚賢，聚賢則萬達」之意。
余絲韻