「國際大鱷」索羅斯早前宣布「金盆洗手」，今年底前將退還客戶嘅投資資產，咁大家一定好關心，佢喺香港嘅對沖基金公司（SFM HK）有冇受到影響？絲絲與對沖基金界嘅朋友傾開偈，佢哋話索羅斯喺香港嘅基金公司雖然開咗業大半年，但暫時嘅規模仍好細，亦唔算太活躍，主要視香港為「收風站」，以便掌握市場所有最新資訊。
SFM HK喺去年十一月一日正式攞咗證監會牌照，當時喺貨幣寬鬆政策下，熱錢氾濫，外界都相信索羅斯會把握資產泡沫機會大舉入市，喺市場興波作浪。
基金界朋友話，索羅斯擁有咁龐大集團，旗下管理資產達天文數字，要喺海外任何一個地方「做嘢」可謂易如反掌，千里迢迢嚟到香港，又要攞牌，接受監管，其中一個目的都係希望貼近內地市場，收取第一手資料以方便部署。佢哋仲話，索羅斯喺香港開Office，亦係因為想方便客戶喺投資之前，到公司進行盡職審查。大家都知，客人肯畀一大筆錢予基金公司投資，梗係要對基金公司徹底了解。
講開又講，索羅斯又點會真正金盆洗手？內地就有傳媒透露，佢老人家之所謂退隱，實情正密謀「大茶飯」，據初步索料分析，其一係狙擊內地經濟漏洞所在，再從中沽空牟利，其二係完成狙擊歐元戰役，圖謀喺歐洲家陣立立亂之際，又可以大賺一筆。絲絲心諗，如果索羅斯喺有生之年能夠完成以上兩大狙擊，隨時可以為自己人生畫上光輝嘅句號！
余絲韻