市場熱線：粵投發揮避險功能

A股可跑贏美股

歐美出事，「貓貓狗狗」（01199）同利豐（00494）跌得好甘。A股一度倒升，上半年美強中弱，皆因美國放水、中國收水，家陣風水輪流轉，老美削減開支，祖國收水政策已近尾聲，醒目資金自然回流，不管你信不信，反正我是信了。斷估A股跟住可跑贏美股，而處於中美之間嘅港股唔知跟邊個，但斷估亦唔會太衰，買A50（02823）較為正路。不過，A股嘅炸彈始終係地方債務，唔係驚拖冧錢莊股，而係驚地方政府為還債而賣股。

香港受美國拖累主要多得聯繫匯率，前日滙豐大班忍唔住建議港紙改嫁一籃子貨幣，政府同金管局亦一如預期say no，高官嘅哲學係少做少錯、唔做唔錯，香港嘅3個A比起美國嘅3個A貨真價實得多，但依家眼白白被獅城過頭。

逆市上升嘅股多數多得大行搖旗吶喊，包括新奧能源（02688）、人和商業（01387）、國際泰豐（00873）等，但都唔夠六福（00590）前日被瑞信調高目標價到51.75元咁誇張，所以尋日仍然創下新高。大行報告短線的確好有影響力，但中長線就會現形，好多時趁報告出街做相反方向反而搵到食。

尋日下跌股數近千隻、創52周新低股數過百隻，自六月開始簡直係二三線股大屠殺，車股算係少數幸免於難嘅股份，但有消息話祖國會收緊小排量汽車嘅補貼門檻，兩隻靠呢3,000蚊人仔補貼嘅車股：吉汽（00175）同比亞迪（01211）臨尾都跌5%以上，依家阿爺逐步收番啲貼錢政策，包括汽車、風電設備、冷氣節能等，呢類股變咗有咁耐風流、有咁耐折墮，年尾到家電下鄉政策到期，家電股唔好坐定粒六，但海爾（01169）尋日就幾生性。

咁嘅市況，真係不賭是贏錢，公用股呢個時候就發揮到避風港特色，中電（00002）、煤氣（00003）、電能（00006）同長建（01038）不斷創新高，但古勝經常提醒大家，粵海投資（00270）亦都算係公用股，每次開水喉飲水思源都會想起呢隻股。粵投早兩個禮拜發埋盈喜，但主要話係因為投資物業升值同預扣稅準備減少所致，唔關核心盈利嘅事。

具注資分拆概念

姑勿論係點，粵投靠東江水源源不絕豬籠入水，財政狀況穩健之下會逐步增加派息，往績息率有3厘半，已經拍得住兩電。而公司另有兩項憧憬：注資同埋分拆酒店，阿媽有機會注入供水同基建業務，而分拆酒店亦講咗好耐，連中旅（00308）分拆酒店都已有眉目，趁o依家酒店業咁旺，其實係適當時候。

粵投勝在風險極低，食大茶飯雖然冇份，但長線升值的確唔錯，如果有注資同分拆，更隨時有意外收穫。

古勝