絲絲講場：意馬擺「羊狼陣」撈埋童裝
有「紅籌之父」之稱嘅梁伯韜（Francis）做咗意馬國際（00585）主席後，動作多多，繼今年四月成功「食羊」後，早前又透過旗下嘅動漫火車，入股生產及分銷《喜羊羊與灰太狼》品牌童裝嘅凌勵企業超過20%，搞動畫之餘撈埋周邊商品，對內地兒童市場嚟個大包圍！
內地3年開店1100家
Francis話今次發展埋消費品，主要係為咗增加《喜羊羊與灰太狼》品牌知名度，又可以通過店舖直接接觸客戶。絲絲聽凌勵主席洪聰進講，佢哋嘅《喜羊羊與灰太狼》童裝價格，由百幾蚊嘅T恤以至幾百蚊嘅外套都有，第一家專賣店會喺九月登場，今年會先開400家，3年內就要喺內地嘅一、二、三線城市開超過1,100家，包括旗艦店、加盟店及百貨公司店中店。
講番意馬，Francis話去年大部分時間都係搞重組、搵方向，之前因為撇帳問題令公司虧損，佢希望收購動漫火車後，喺新財政年度可以有正面嘅盈利貢獻及合理嘅增長，意馬未來會繼續喺內地搜尋以家庭及娛樂事業為主嘅品牌業務，而公司依家嘅資金亦好充裕，冇集資壓力喎。
（余絲韻）