絲絲講場：花旗教路防受騙
相信大家都接過銀行職員Cold Call電話，推銷個人貸款、信用卡之類嘅服務，但原來部分可能係不法分子冒充，目的係騙取個人資料用作入侵戶口，以及冒名申請貸款及服務等。花旗環球個人銀行服務風險管理部副總裁郭龍民（Ronald）話，佢哋從來唔會向非現有客戶作電話推銷，仲教咗絲絲幾招傍身。
核實身份 簽名防偽
Ronald話，通常騙徒唔會留低有效嘅聯絡方法，所以當市民收到推銷電話時，就要留低來電者嘅資料，甚至可直接向有關銀行核實對方身份，而花旗就設立咗一個24小時熱線，令市民可查詢分辨真偽。
另一招就係唔好處處都用同一款簽名，例如係有物業嘅話，就可以透過查冊搵到業主嘅簽名筆迹，所以Ronald話不妨考慮喺唔同情況下，用唔同嘅簽名，令騙徒無從模仿。當然，要記住唔同嘅簽名的確有啲難度，不過千祈唔好偷懶抄低晒啲簽名及用途作紀錄，以免資料外漏。
咁銀行有乜嘢方法阻止騙徒冒名申請呢？Ronald話佢哋主要靠提升辨認系統以及培訓員工，例如係針對騙徒有時會竄改入息證明及地址證明等。
（余絲韻）