阿里巴巴（01688）母公司阿里集團、美國雅虎（Yahoo）及日本軟銀（Softbank）就支付寶控制權轉讓嘅磋商，到咗依家仍然未有結論，《華爾街日報》知名嘅科技專欄作者Kara Swisher預言，喺今晚公布業績嘅雅虎，唔使旨意咁快有結果，佢形容呢3位支付寶嘅股東，就好似經典西部牛仔片《獨行俠決鬥地獄門》（The Good , the Bad and the Ugly）嘅劇情一樣，3人持槍互相對決，大家都想獨享寶藏。
《獨》片係奇連伊士活喺六十年代主演嘅經典西部牛仔片之一，年輕一輩雖然未必睇過，但只要聽到套戲嘅主題音樂，好多人都耳熟能詳。呢套戲內容係作為主角嘅奇連伊士活與一名通緝犯及一名惡警官，為奪取寶藏而互相利用。Kara Swisher就以呢套戲嚟做比喻，指阿里、雅虎及軟銀雖然都想獨佔寶藏，但依家總要搵出一個和平共存嘅方法。
佢更加喺文中引述消息話，有關談判遲遲未有突破，係因為軟銀態度強硬，談判愈拖得耐，雅虎承受嘅股東壓力就愈大，有基金已經「用腳」嚟投票，沽出雅虎股票，以表達對雅虎處理支付寶事件上嘅不滿。
余絲韻