烏雲蓋頂嘅李寧（02331）不斷成為基金、大行「掟貨」目標，不過最傷一役莫過於五月份內部高層突然「起飛腳」，3位高層包括當時嘅首席營運官郭建新請辭消息曝光，令股價一沉不起。所謂「經一事長一智」，李寧決定不惜重金，向高級管理人員發放認股證兼獎勵股份，以求穩住人才。
李寧尋日向公司8位董事、15名高管送出合共669.9萬股可供認購嘅購股權，行使期為6年之內，行使價每股9.896元，單係呢份厚禮已值近6,630萬元。
李寧想Mark實邊啲人才？重點當然係行政總裁張志勇，皆因佢嗰份購股權最重手，有成83.67萬股，不過佢都好識做，早前以實際行動支持公司。點樣支持？當李寧股份喺上周被澳洲聯邦銀行及摩根大通「清貨」、合計套現逾1.24億元之時，張志勇亦一連5日以每股平均價9.115至10.38元不等，增持公司股份至1.1%。李寧股價尋日趁機反彈4.464%，收報9.36元。
其次要Mark實嘅係首席財務官鍾奕祺，佢有70.68萬份購股權。有5位非執董及獨立非執董亦獲發購股權，數量均等，一律20.9萬份。
李寧亦好重視其他管理人員，今次同時向72位管理人員送咗164.7萬股獎勵股份，佔公司已發行股本約0.16%，反映李寧今次真係有意大手收買人心，以收復失地。
呢批購股權之中，部分係與公司業績掛鈎，並會由明年七月一日起，連續3年分3批供行使，換言之想集齊認股證，起碼要喺公司做多3年。
余絲韻