政府推出嘅iBond回報與通脹掛鈎，應該吸引到好多想保本嘅小市民申購，不過勢估唔到連長實（00001）執行董事兼置富產業信託（00778）主席趙國雄都有興趣，但佢話冇時間去銀行搞手續喎。
趙國雄主動問絲絲會唔會買iBond，佢就話自己好想買，但呢排成日要飛外地，前晚先至返香港，呢兩日朝早7、8點就要返公司做嘢，稍後又飛去新加坡推介長實喺當地嘅樓盤，到下周中至返嚟，所以根本冇時間去銀行搞買iBond嘅手續。
絲絲提議叫阿女趙宇幫手申購，點知佢話唔得，因為怕洩漏畀個女知佢有幾多身家，仲笑住話阿女成日吼住喎。佢咁講當然即時引嚟哄堂大笑，絲絲知佢講吓笑啫。
置富產業信託品牌重塑，趙國雄及趙宇貴為主席及副行政總裁，尋日拍住搞宣傳，新嘅品牌叫「置富Malls」，仲設計咗新標誌，希望以新嘅品牌策略及形象標誌去統一經營旗下14個商場。趙宇解畫話，新標誌好似一大一小兩個星球部分重疊，寓意唔同嘅群體走埋一齊，就好似佢哋嘅商場與社區保持和諧融洽嘅關係。雖然所有商場嘅Logo一樣，但有分唔同顏色以資識別，又好似幾有意思喎。
（余絲韻）