宏利尋日公布三項人事任命，當中有一個絲絲非常熟悉嘅名字就係李哲恒（Alvin），佢嘅職位係機構經銷部副總裁，相信大家都記得，Alvin就係將恒生保險搞得有聲有色，去年先至離任嘅恒生保險前行政總裁。
仲記得喺金融海嘯後，Alvin睇準當時市場大賣嘅投資相連保險，好可能會受股市波動所拖累，因此大力主張恒生主攻人壽保險，令恒生壓過友邦保險成為○八年本港新做保險嘅一哥。
Alvin嘅新工作係專責宏利產品喺本港機構嘅經銷渠道事宜，例如銀行、經紀及獨立理財顧問等，以及相關嘅市場推廣及後勤部署，相信以Alvin嘅經驗及能力，應該勝任有餘。
其實依家保險公司愈來愈注重銀行嘅分銷渠道，除咗今次宏利講明要強化機構經銷渠道，委任對銀保有豐富經驗嘅Alvin之外，早前友邦亦委任林昶恒做副總裁兼銀行保險部主管，加埋近幾年表現好好嘅中銀人壽及滙豐保險，相信未來保險市場又有一番龍爭虎鬥。
（余絲韻）