市場熱線：中國地板歸邊易炒

「紅旗股」多數有反彈，「木滴」嘅紅旗報告好多都係「莫須有」，好似上市年期短、股權集中、增長太快、毛利率高都係罪名，乜呢啲唔係優點嘅咩？佳兆業（01638）同禹州地產（01628）均澄清近年冇換過核數師，連呢類資料性嘅嘢都搞得錯，份報告可信性有斷估冇痛苦。

做好做淡係膽博膽

老美放啲打手出嚟亂咁搞人，陰謀論話驚住國會傾唔掂提高債務上限亦可減輕破壞力，全球唔恐慌又點顯得美債穩陣呢？如果個市可以繼續反彈，咁樣前日就屬於「終極一跌」，但可惜次次都係事後孔明，然後悔不當初。

每次大跌市都係一次財富轉移過程，有股友前日被震出局，亦有股友低位撈到建行（00939），呢輪做好友或淡友都係膽博膽，主要睇住老美有乜風吹草動，提高美債上限喺呢十幾日內就隨時有結果，阿伯呢兩日上國會講嘢亦唔知啱唔啱聽。學黃國英話齋，見期指臨尾大高水或大低水然後做相反動作，贏錢嘅機會幾大，其一原因係美股期指亞洲時段參考作用好低。

內銀中期業績預咗好，內房公布咗嘅半年賣樓成交亦令人跌眼鏡，三大內房股：恒大地產（03333）、中國海外（00688）、潤地（01109）升到你唔信，砵砵車同水泥股亦係繼續咁勁，雖然話個鼓勵買車政策九成係流料，但六月賣車較五月回升總算係好消息，華晨（01114）又創新高，據聞寶馬喺祖國非常好賣，亦考慮加價，而另一車股比亞迪（01211）發盈警仍可先跌後升。

意大利冇水，「趴打」（01913）來港撳錢成功，AC米蘭又想嚟掠水，但古勝睇意大利波個球場成日空空如也，講號召力又遠不如曼聯，直情當港交所（00388）係金礦。

尋日兩隻新股有一隻破發，今日上市嘅中國光纖（03777）同金盾（02123）暗盤價都輕微做好，前者冇人認購可能仲好。但呢輪最威都係半新股，翔宇疏浚（00871）三日兩支大棍差啲重上招股價，而中國地板（02083）上市收貨個幾月之後亦嚟料，跌一輪再上升，無論止蝕盤或獲利盤都盡歸大戶所有，公司老細亦出手增持。

內地市場大有潛力

中國地板係祖國最大木地板品牌，香港好多住宅鍾意用木地板，但原來祖國有七成樓面未舖任何地板，相信大部分屬於農村地方，但農村依家都富起來同搞城鎮化，會比較肯花錢做裝修。另外，木地板嘅市佔率得10%，原因亦相信同價錢較貴有關係，但隨住同胞日益富裕，比率估計會慢慢攀升。

集團個品牌名叫「大自然」，希望同環保扯上關係，除咗做地板之外，亦有做木門同衣櫃，受惠於國策有保障房同木製建材下鄉。中國地板現價一一年PE約13倍幾，以一間有品牌嘅內需股算幾合理，淨計零售店都有接近3,000間，長線幾唔錯，而短線炒貨源歸邊亦有諗頭。

古勝