絲絲講場：新股上市賀禮省招牌
踏入七月，新股上市冇停過，尋日就有兩隻「細細粒」新股上市，分別係中式酒樓集團喜尚（08179）以及印刷線路板生產商依利安達（01151），佢哋當然有預備禮物送畀港交所（00388），分別送咗一對特別嘅桔及一個聚寶盆。
絲絲細問之下先知，喜尚送一對豬形嘅桔係有名堂架，因為佢哋嘅燒豬出名到拎到米芝蓮，送嘅禮物當然亦與豬有關，所以就取其諧音改名叫「諸事大吉」，夠晒好意頭及有心思，更配合埋佢哋嘅招牌菜！
至於依利安達送嘅聚寶盆，公司話除咗聚財，寓意係港交所聚集唔少好公司嚟上市，明讚港交所之餘，亦暗地讚吓自己，果然有深度。
余絲韻