香港嘅國際金融之都美譽並唔係浪得虛名，近年新股市場威震海外之餘，原來就連唔少中環「賓卡」精英嘅薪酬加幅，都勁過倫敦以至歐洲。
雖然「三個和尚沒水喝」嘅故事耳熟能詳，不過獵頭公司Astbury Marsden最近就發現，香港有好多銀行及對沖基金為咗防止員工跳槽，喺啲「賓卡」仲未獅子開大口之前，反而會果斷決定加薪畀佢哋，呢個「回購」方案預計仲會將底薪提高25%。冇計啦，依家專業金融服務個餅愈發愈大，既然需求上升，4個「賓卡」中分分鐘就有3人打算跳槽，公司唔想人才流向競爭對手，惟有先發制人靠可觀加薪留人。
同樣喺供求關係嘅宿命下，倫敦以及歐洲嗰邊，有意跳槽嘅「賓卡」就最多只獲加薪15%。
Astbury Marsden仲話，有好多歐資銀行忙於為香港嘅分行請多啲「賓卡」，隨時搞到班歐洲「賓卡」西家唔打打東家。
余絲韻