絲絲講場：王朝譯酒名有段古

「梅鹿輒」即係Merlot

王朝有隻梅鹿輒系列紅標及金標紅酒，以及半乾白葡萄酒，白總話佢哋嘅梅鹿輒即係英文嘅Merlot，係眾多紅酒中嘅一種，果味較濃，呢隻酒嘅中文譯名叫梅鹿，不過佢一聽就覺得唔係好妥，普通話發音好似「沒路」；後來佢哋改為「梅洛」，點知仲衰，因為譯音好似「沒着落」；佢諗諗吓覺得「梅鹿有輒」較吉利，寓意凡事都「有輒」即能成事，於是就改名為梅鹿輒。雖然白總係呢個名嘅創始人，但有關當局冇畀佢註冊，於是內地好多人都用咗佢梅鹿輒呢個名作為Merlot嘅中文譯名，而唔再用以往嘅梅鹿，佢想追討亦無門。

白總認為酒同餸應該要夾到至得，所以早前絲絲與白總食圍村菜，佢特登請咗有「食神」稱號嘅韜韜，幫佢設計咗張配合紅、白葡萄酒嘅圍村菜餐單，都幾特別。白總仲話，佢哋王朝喺香港嘅銷售手法之一，係要先打入各大食肆。