「四叔」（恒地（00012）主席李兆基）增持唔係新聞，佢「減持」先至係新聞！一向眉精眼企嘅絲絲發現，四叔申報喺本月一日減持恒地（00012）超過5,900萬股，以尋日收市價計，涉額達30億元，持股量由63.3%大降至60%水平，真係大新聞。
絲絲其實心裏有數，但都致電向好姊妹—─恒地大公關Bonnie求證，問題果然係出喺已經變成廢紙嘅恒地紅利認股權證（紅輪）身上。
事關恒地呢批「紅輪」，未到期前全部計入四叔持股之內，所以一直係有「發水」情況。呢批紅輪因行使價高於市價，六月一日已到期作廢，涉及嘅股份亦告撇銷。
Bonnie解釋話，四叔喺四月出資100億元行使大部分紅輪轉為正股，剩餘未行使嘅就係呢5,908萬多股，紅輪撇銷後，最新持股至係四叔嘅「真身」。
四叔喺本月一日及二日亦再喺市場買入咗250.2萬股恒地，涉資1.297億元，佢嘅最新恒地持股量係約14.28億股，佔60.82%股權，而今次連串增持行動，其實已投入超過32億元啦！四叔同時亦申報持有恒基發展（00097）約21.15275億股，佔約69.41%股權。