絲絲講場：鄭海泉榮休飯局有排食
鄭海泉（Vincent）自從喺上月退任滙控（00005）執董後，尋日首次以滙豐集團行政總裁顧問嘅身份出席公開場合，事關滙豐保險與中大合作搞嘅保險課程舉行畢業禮，身兼中大校董會主席嘅Vincent當然畀面出席。
相信大家都關心Vincent退下來之後嘅生活，佢話近排好唔得閒，忙於出席私人飯局與朋友食飯敍舊，慶祝佢榮休嘅歡送會仲有部分未舉行。Vincent喺滙控及銀行界縱橫三十幾年，當然有大把朋友爭住同佢敍舊啦。除咗呢啲敍舊活動之外，Vincent近日好積極做運動，佢以前已經每日游早水，依家仲做埋Gym，玩吓每樣健身器材都要搞成朝喇。
湯德信執教鞭緊張
本來絲絲想與Vincent傾多幾句，不過畢業禮一完，佢就急急腳咁離開，絲絲聽老友講，話Vincent係趕住參加下一項活動，睇嚟佢退休後真係不愁寂寞。
講番呢個保險課程，滙豐保險（亞太）主席兼行政總裁湯德信（David）親自上陣，擔任第一堂嘅講師，話晒David係第一次喺香港執教鞭，當然會有啲緊張，不過佢話好好彩，上佢堂嘅學生冇一個瞌眼瞓，佢哋嚟緊希望繼續與中大舉辦同類課程，甚至推廣至其他地區。