滙豐又有人事變動，之前有滙控（00005）執董鄭海泉退休，今次就係滙豐香港區個人理財業務主管麥倩華（Francesca McDonagh）升職，絲絲八到，Francesca會調去中東，擔任中東區零售銀行及財富管理總監，聽聞佢喺一個月內就會趕赴中東述職，唔知今次會由邊個頂佢個位呢？
滙控早前話要重組個人銀行業務，今次嘅調動會唔會係配合呢個策略呢？Francesca仲會升埋做環球零售銀行及財富管理執行委員會成員，直接向滙豐中東及北非副主席及行政總裁Simon Cooper、滙控環球零售銀行及財富管理業務行政總裁郭兆聰（Paul Thurston）匯報。
其實Francesca喺九七年加入滙豐，○九年先至調到香港負責個人理財業務，期間佢曾喺好多唔同嘅國家工作，包括墨西哥、埃及、美國及巴拿馬。佢話最難忘喺埃及工作時，每周會抽兩日喺早上6時起床，然後騎馬喺沙漠中馳騁，到名勝金字塔觀賞日出，作為開工前嘅熱身活動。熱愛騎馬嘅Francesca嚟到香港後難以一展所長，惟有喺周末時帶同佢嘅兩隻金毛尋回犬到山頂散步。
絲絲覺得奇怪，今次升職消息係由滙豐內部嘅通告爆出嚟，而唔係出新聞稿或者公告，唔似滙豐平時嘅作風。
（余絲韻）