市場熱線：互太紡織強勢突破

藍籌股尋日表現唔算差，淨係得友邦（01299）染藍後有回吐都算正常，較差嘅反而係地主股，聽日賣地萬眾期待新地王誕生，但九七年小西灣誕生新地王之後冇幾耐就爆煲，今次唔好大吉利是。

中信資源買得過

「趴打」（01913）雖然加價30%招股，但有影子概念嘅奢侈品股就反高潮，珠寶鐘錶股全跌，利邦（00891）亦跌3%，其實「趴打」去到28倍PE招股，主要靠祖國同胞掃貨概念，不如直情買以內地為基地嘅名牌零售股好過，利邦係隻好股，但PE同「趴打」差唔多。

中信資源（01205）以每股1.38元供股，但尋日跌到1.42元，隻威士更跌到最低價1仙，想人唔供股乎？橫掂有阿媽包底，抑或其實係阿媽想增持嘅計謀？總之油價升到100蚊美金，但中信資源股價仍係停留舊年中水平，既然股價跌至近供股價，不如喺孖屐買好過供股，起碼多啲彈性。

古勝尋日講到美加上市嘅民企連環被篤爆假數嘅問題，呢個恐慌傳到去香港，超大（00682）再跌8.9%，中綠（00904）跌4.9%，小型礦股同林業股亦都捱沽。在下大膽講好多公司盤數都有問題，所以細價股只可以玩短線，要揸長線就揀大粒佬啦！

兗煤（01171）單日轉向，中煤（01898）更升近3%，得神華（01088）仍係要跌。阿爺見勸喻煤企唔好加價無效，新招數係調低煤炭進口增值稅，內地煤價不嬲貴過進口煤，呢招逼煤企減價更為實際。

資源同農產品價格喺投機炒賣之下一向好波動，好似棉花價格咁樣，今年二月創咗新高，但近兩個月暴跌三成，本來對紡織企業來講係好事，因為成本低咗，但如果有太多存貨嘅話，隨時要蝕入肉，有調查話好多細紡織企業要停產。

舊年棉價高升，照計紡織股冇運行，但實情卻非也，魏橋（02698）賺多82%，互太紡織（01382）同福田（00420）中期業績亦有增長，互太尋日股價創咗52周新高，可能係炒定本月派嘅全年成績表，公司往績PE9.5倍，預計會降到8倍幾，預測息率係6厘幾。互太息率高，但講PE唔算平，因紡織股不嬲係低PE，但互太咁強，應該有唔少芬佬捧場。

有力擴大市佔率

睇番互太，的確有佢本身獨到條件，公司早就去東南亞設廠，唔使受內地狂加人工嘅成本拖累，斯里蘭卡嘅分公司已搞緊分拆上市，而公司亦喺越南設廠同UNIQLO合作生產針織布。

UNIQLO舊年想分散投資將部分生產線搬離大陸，互太泊到呢個大碼頭，加埋內地好多中小紡織廠捱唔住棉價大上大落而執笠，互太嘅市佔率可望進一步上升。

戰報

合動能源（00578）+12%

合動能源繼續有追捧，尋日高位做0.85元，較高仁上周二推介時低位0.76元，累升近12%。

DBA電訊（03335）+16%

古晨上周四揀嘅DBA電訊昨逆市創新高，最高見2.16元，以推介日低位1.87元計，最多賺近16%。

古勝