市場熱線：中遠洋趁低買貨

美國呢個禮拜或者炒吓經濟數據，呢排嘅數據同預測相差得好離譜，所以唔好坐定粒六。希臘退出歐盟單傳聞亦搞到個市波動，孖屐真真假假好難分，好似愛爾蘭同葡萄牙夠係口口聲聲話唔使人救，結果傳傳吓就變咗真。

大笨象（00005）公布季績前做好，係帶動恒指嘅最大力量，但季績後喺英國即跌，今日有「策略日」睇吓點減成本。友邦（01299）炒染藍愈炒愈高，早排仲話驚禁售期滿有沽壓，但大戶沽貨愈沽愈高唔出奇。內房股顯著反彈，上海同重慶大鑼大鼓收房產稅，結果100日收得唔夠100萬人仔，所以政策嘅嘢最緊要睇執行力度。

中投顯點石成金威力

呢排中投玩嘅股票都有點石成金效果，中芯（00981）創咗一年高位，旭光（00067）繼續以45度角上升，古勝早前已同大家講過中芯，祖國要培育自己嘅芯片技術，尤其出年台灣可能回復綠營揸旗，到時政策隨時又有變化。

旭光除咗升得勁之外，仲保持「三陽一陰」嘅規律，咁升法但PE仍然唔夠10倍，呢隻同東岳（00189）有啲類似，唔係業務類似，而係股民多數唔知間公司究竟做乜，古勝連芒硝都係一知半解何況佢嘅新產品PPS！不過咁至好炒，隨街有得賣嘅產品冇晒神秘感，亦唔慌炒得去邊。

今日祖國會公布CPI，照計對孖屐影響唔大，好多專家都話通脹會喺年中見頂，而且呢排商品價格回落，估計最多都係再加存款準備金率，RRR加得多已麻木。祖國尋日公布咗外貿數據，四月份出入口依然理想，尤其係出口增長接近三成，金額創歷史新高，數據應該可以刺激航運股同碼頭股。

碼頭股表現四平八穩

喺上周五油價大跌當日，航運股亦急升，但升咗一日之後，禮拜一又冇料到，中國遠洋（01919）首季見紅的確令人驚心，但油價回落的確對航運業會有幫助，航運股已跑輸畀大市好耐，應該乜嘢負面消息都反映晒。不過，貪穩陣嘅話可以考慮碼頭股，航運股衰係因為呢兩年太多新船落水累鬥累，但新船多反而益咗碼頭股。

「貓貓狗狗」（中遠洋01199）除咗經營碼頭之外，仲有透過中集生產貨櫃同埋租賃，生產貨櫃有幾好景睇同類股勝獅（00716）就知道，而租賃貨櫃生意亦大增。至於碼頭生意都有增加，除咗貨櫃吞吐量增加之外，處理費今年亦普遍加價。

大行對「貓貓狗狗」今年嘅盈利相當睇好，目標價由16.7元至20.7元不等，上月尾升到17蚊附近，然後回吐一成幾，周一有反彈，但仍係可以趁低吸納。

戰報

志高控股（00449）+12%

桃桃上月二十九日揀咗隻志高，當日低位見過0.73元，周一以全日高位0.82元收市，累升近12%。

大唐發電（00991）+10%

古晨上周二話可以冷吼隻大唐發電，周一高位為3.12元，較推介日低位2.82元累升近10%。

古勝