近日天氣漸轉炎熱，詩詩夜晚都已經要開冷氣瞓覺。不過，未等到夏天來臨，冷氣機股志高（00449）早喺二月頭就已經起步，由0.53元低位一直穩步升至上周最高0.78元，累升近五成。
事實上，受惠「家電下鄉」同「以舊換新」等國策，志高去年全年收入增長達49%，至92.76億元（人民幣‧下同），惟最終盈利輕微倒退1.6%，至3.09億元，是由於集團主席以個人名義向部分員工及客戶饋贈股份，因而出現一筆約6,100萬元的一次性開支所致，撇除此數，實際盈利增長逾四成。
志高近年憑節能空調和變頻空調產品成功搶佔市場，其表現並吸引到百仕通旗下對沖基金SENRIGAN，上月中以每股0.7元（港元‧下同）大手增持4億股，而金利豐朱太亦數度買貨。
以現價0.77元計，較SENRIGAN入貨價只高一成，大孖沙胃口，斷唔會就此滿足，目標贏幾個開亦唔出奇，詩詩認為短線重上52周高位1.07元，係最起碼嘅誠意表現，跌穿0.7元止蝕。
詩詩