孖妹缸湖遊：埃利安：美股6月隨時冧

今次好榮幸請到被譽為「世界上最聰明投資者」之一，被選為○九年及一○年「全球100名頂尖思想家」嘅埃利安做訪問，佢與PIMCO創辦人──「債王」格羅斯喺金融海嘯後有關經濟低增長嘅「新常態」（New Normal）言論，最廣為人熟悉。

PIMCO呢一家全球最大嘅債券基金公司成功涉足股市，曾掌管哈佛基金嘅埃利安實在功不可沒，佢近年積極成立債券以外嘅資產基金，除股票以外，亦有專門投資房地產及購併業務嘅基金，就連交易所買賣基金（ETF）都有推出。

有人話埃利安自細就好杞人憂天，所以永遠要深思熟慮後先會下決定，相反格羅斯就鍾意憑直覺行事，佢哋兩個唔知係咪因為咁，可以互補不足成為好拍檔呢？

埃：太平洋投資管理（PIMCO）行政總裁埃利安

QE2結束 撈貨良機

祺祺：你之前提過拉登死訊有助降低美國嘅安全風險，總統奧巴馬可以藉事件團結國家，消息亦可刺激國際股市上揚，但各國政府債券價格反而會應聲下挫。呢啲對金融市場嚟講都係非常短期嘅影響，如果我哋想望遠啲，應該留意乜嘢？好似聯儲局喺六月底就會退出QE2，會唔會衝擊股債市場？

　埃：QE2當中包括由聯儲局購入價值6,000億美元規模美債嘅措施，會喺六月底告一段落，一直撐住美國財政預算赤字嘅主要金融家（意指聯儲局）就快會退落嚟，我哋相信退市行動對美國股市及債市都會構成影響。我相信QE2完結後會係投資美股嘅適當時機，金融市場早前受惠於呢一輪非傳統而戲劇性嘅政策，當措施愈近尾聲，市場要面對嘅沽售風險就愈高。

高妹：債市會落番私人投資者手上，唔再受美國政府干預，格羅斯仲為六月三十日起咗個名叫「D-Day」（軍事術語中形容作戰或行動嘅發起日），以象徵QE2完結。你哋嗰隻規模2,470億美元（約18,774億港元）嘅債券基金Total Return Fund早前沽售美債，連你都話啦，當美債估值再回落，要喺好時機先會再吸納。

　埃：聯儲局買入債券計劃嘅措施抑壓美國利率抽升，事實上，低息環境提高投資者入市意欲，帶動美國以至其他地區嘅股市及債市表現。我哋相信當QE2告一段落，美國利率會面對趨升壓力，美股可能會回落。

息策各異 美元續弱

祺祺：咁即係美股喺六月後就會冧？當你正擔心希臘會迷失10年，重蹈拉丁美洲嘅覆轍，仲話當地經濟及金融狀況距離「穩定」仲係好遠之時，喺地球另一邊嘅中國，經濟增長就好強勁，仲不斷提高銀行存款準備金率至歷史新高，以制衡通脹。

　埃：雖然希臘債券價格正大幅調整，但好可能會出現債務重組，當中帶嚟嘅負面因素仲未充分反映喺市場估值上，所以未係入市時機；相反巴西及挪威對內及對外嘅資產負債表都好強勁。我哋見到各國央行就經濟狀況採取唔同嘅政策，呢種政策上嘅分歧，與依家各國經濟增長速度快慢有異嘅情況好脗合。

高妹：全球最大經濟體美國要應付通脹壓力，最好嘅方法就係用「自然療法」，任由油價飆升。你都話啦，太早加息可能會弄巧成拙，引發通縮。

　埃：好多新興經濟體都提高利率，作為抗衡通脹及防止經濟過熱嘅一個方法，與此同時，有啲領先嘅經濟體尤其係美國，就維持非常寬鬆嘅貨幣措施。唔同政策嘅組合，導致各國股市及債市表現有高有低，令美元喺國際間嘅價值受壓，亦係推高眾多商品價格嘅因素。

油價升破150引發滯脹

祺祺：嘩！咁美元咪冇運行？

　埃：究竟呢個國際政策組合能否持久，仲需要時間觀察，特別係美國會發現，要維持咁寬鬆嘅財政及貨幣政策變得愈嚟愈複雜。

高妹：喺美元積弱下，商品價格好似只係個別發展，點解會咁嘅？

　埃：商品整體價格飆升嘅背後有一連串原因，佢哋相對嘅重要性視乎個別商品而定。

祺祺：聯儲局就快「閂水喉」，金價會唔會見頂回落？商品價格走勢取決於乜嘢因素？

　埃：首先係供應及需求錯配，某啲商品需求增速較供應快，基於開發程度，北非及中東地區嘅原油供應量好唔穩定，加上經濟體系對美國注入嘅龐大流通性不勝負荷，令資金最後流向商品市場。商品市場未來嘅走向取決於供求增速及資金流通性，當油價升穿150美元，環球經濟就會面對重大嘅滯脹危機。

埃利安（Mohamed El-Erian）小檔案

現職 太平洋投資管理（PIMCO）行政總裁

履歷 曾任哈佛管理公司主席兼行政總裁、PIMCO董事總經理、PIMCO組合管理及投資策略小組高級成員、花旗所羅門美邦新興市場經濟研究小組負責人、國際貨幣基金組織（IMF）中東部門副主任

學歷 牛津大學經濟學碩士及博士、劍橋大學學士

著作 《When Markets Collide》（中譯：《經勢大激撞》，為《經濟學人》年度之書，並獲《紐約時報》及《華爾街日報》選為最暢銷書籍）

31.5%散戶逆市抽新股

踏入五月，港股雖暫現「五窮」迹象，但仍有來自各行業的新股排隊上市，當中包括上海醫藥（02607）、米蘭站（01150）及嘉能可（00805）等。你會認購新一批新股嗎？據今期《東方日報》網上民調截至上周六晚上6時嘅結果顯示，話會認購嘅人佔31.5%，其餘68.5%人就話唔打算認購。

高妹、祺祺

若有料報畀高妹同祺祺或有嘢問，可電郵money.biz@opg.com.hk