市場熱線：中生製藥隨時發威

跌咗8日，恒指累計跌幅都唔夠1,000點，睇落其實又唔係咁差啫！商品價格大跌起碼可以降低通脹風險，即係祖國唔使心急加息，最開心梗係飛機股同航運股，國企指數上周五回升41點，成分股有27隻升得10隻跌，之前8連跌當中有7日都係國指跑輸，但上周五有資金炒落後，走勢明顯逆轉。

大笨象（00005）喺今日公布首季營運狀況前跌1.37%，拖累恒指跌102點，期指低水189點算回復正常，但成交得65,743張，資金亦流入三大油股窩輪。電力、航空同航運股都做好，前兩日插到好傷嘅鐵路股亦都反彈，皆因鐵道部發言人話唔會叫停進行中嘅高鐵項目。

恒安成染藍熱門

下個禮拜恒指做季度檢討，大孖沙貼友邦（01299）同恒安（01044）係染藍熱門，上個禮拜友邦創新高，恒安上周五亦升3.83%，講晒士梗係友邦大，但港交所（00388）一直嫌金融股比重太高，所以恒安打尖亦唔出奇，其實香港靠晒金融地產使乜怕醜認。

全球最大商品貿易商嘉能可（00805）今個禮拜招股，撞着商品價格大跌，真係唔知攞景定贈興。而上藥（02607）就有阿爺幫手托市，商務部發布咗「藥品流通行業專項規劃」，提出到一五年形成一至三家年銷售額過千億嘅全國大型醫藥集團，即係擺明益龍頭公司，除咗有助上藥招股之外，國藥（01099）上周五亦升2.5%，而藥股升幅最大嘅係半新股泰凌（01011），創新低之後倒升11.8%，半新股一收夠貨就開車。

依家好嘅藥股都唔會平，好似國藥、康哲（00867）、金活（01110）、微創（00853）、神威（02877）、聯邦（03933）同中國生物製藥（01177）等，中生製藥往績PE達25倍，但舊年賺多43%，今年兩次回升到3蚊附近就止步，但趁住藥股呢排嘅旺勢，如果今次突破到3蚊，應有力再衝一成，即係舊年十月高位3.3元附近。

泰德係手上王牌

中生製藥主要產品係心腦血管藥、肝病藥、抗腫瘤藥同鎮痛藥，另外積極開發新藥，舊年新藥貢獻營業額23.3%，而佢旗下公司北京泰德已申請喺A股上市，北京泰德嘅藥可以攞到出口去日本嘅GMP認證，相信質素有番咁上下保證，泰德生產嘅心腦血管藥「凱時注射液」係中生嘅王牌產品，係同類產品中市佔率最大，舊年銷售額增長44.4%至11億元。

藥股前後兩次降價，搞到前排跑輸大市，但呢輪已消化晒有關消息，事實上，藥價年年都話要降，但次次到最後都係不降反升，藥廠不嬲係「上有政策、下有對策」，故藥股忍咗咁耐，今次發威應該唔止升兩、三日咁短癮。

戰報

維奧集團（01164）+22%

古晨上月二十八日揀咗隻維奧，當日低位0.91元，上周五高見1.11元，勁賺近22%。

環球實業（01026）+14%

帥哥上月二十七日話可冷敲嘅環球實業，上周五高見0.435元，較推介日低位0.38元累升逾14%。

古勝