孖妹缸湖遊：黃紹開笑傲缸湖

黃：海通國際證券集團前副主席及行政總裁黃紹開（現留任海通證券股份有限公司海外業務顧問）

97金融風暴感受最深

高妹：首先祝賀你光榮退休！縱橫股壇逾40年，你曾見證大大小小嘅狂風雷暴，哪一件金融大事件令你印象最深？

　黃：當然係九七年亞洲金融風暴喇！當年國際金融大鱷索羅斯利用股市、期指及匯市衝擊港股，搞到恒指曾跌至6,000點低位。當時香港剛啱回歸，對沖基金乘機進襲港股，希望衝擊港元與美元脫鈎。當年港府動用1,200億元外匯基金買港股，呢個決定嘅風險真係好大，若非巴西及俄羅斯亦爆發信用危機，香港真係冇咁易脫險。

祺祺：九七金融風暴原來咁恐怖，以前索羅斯都只喺外國狙擊港股，今時今日啲對沖基金就進駐本港，仲要名正言順開埋辦公室，唔知佢哋有乜詭計？

　黃：今日港股嘅客觀條件已經唔同晒，以前對沖基金係同港府玩，但今日佢哋要交手嘅，卻係中國政府。依家香港係受保護嘅，回歸後香港經歷幾次股災都冇事，你估真係夠運咩？全靠中央嘅政策，例如係開放自由行、投資移民咁。不過，我唔係話香港有人保護，散戶就唔使擔心，相反投資時更要做足功課，令危險程度減低。

未來睇中國市場就掂

高妹：好多散戶都知跟住「阿爺」搵食實掂嘅！不過依家嘅投資產品多不勝數，新興市場又咁多，環球金融消息周圍飛，散戶要睇住好多嘢o架。

　黃：散戶唔使睇太多嘢嘅，淨係睇住中國市場就得！未來美國經濟會慢慢復甦增長，而日本嘅經濟一直都唔係特別好，現時經濟重點就係睇重建，不過始終都係民富國窮。雖然依家中國面臨高通脹風險，但長期係唔會惡化下去，加上內地經濟將會由外向型逐漸轉為內向型，未來中國人嘅財富不斷增長累積，當儲蓄增加，購買力自然上升，所以我十分看好中國內需市場嘅發展潛力。

祺祺：哈哈，唔通你暗示我哋去買內需股？係喎，你做證券行生意咁多年，你自己又有冇做過散戶呀？

　黃：我唔畀投資意見o架，你問番我啲同事啦！我當然做過散戶，一九七三年股災，我真係差啲「輸到阿媽都唔認得」，當時我與渣甸（即英資大行怡和）嘅一班朋友夾錢組合基金炒股，每人出資一萬蚊，等同依家嘅幾十萬，當時諗住個個都係金融界專家會冇事喇，點知最後蝕剩10%唔夠。呢次經驗亦令我明白一個道理，就係「Prepare the worst,look for the best」（作最壞的打算，作最好的期盼）。

高妹： 連財金專家都估錯市況而輸錢，咁散戶咪輸梗？

　黃：所以你千祈唔好當正自己真係專家，有時候畀你買到好股都冇用，因為一個大浪沖埋嚟，乜嘢股票都可以跌。你可以做足投資功課，例如分析港股歷史，但你永遠唔可以預知未來，亦唔會估到經濟衰退幾時出現，所以投資策略永遠係唔好將所有雞蛋放喺同一籃子內，一定識得分散投資風險。

分散風險 密炒高危

祺祺：投資要識得分散，咁你認為係咪炒得多就會贏得多呢？

　黃：真正嘅投資當然唔係指日炒夜炒啦！我認為經營證券行最重要嘅目的，就係保護客戶資產，如果個個散戶都拎晒成副身家日炒夜炒，呢個行為對散戶及證券行同樣危險，因為投資係追求合理回報，而非暴利回報，應利用資金去投資具有生產能力嘅企業。追求暴利回報唔係唔得，但一定係利用小部分錢去做，如果人人都輸晒啲錢，即係代表證券行少咗客戶，客戶有損失之餘，證券行一樣有損失。

高妹：你講得啱，投資太過進取，最終只會「貪字得個貧」，所以我都要做個精靈又醒目嘅散戶。

　黃：其實依家有好多散戶都好聰明、好理性。回想七三年股災，當時嘅新股招股書只係一張薄紙，散戶唔識睇亦唔會去睇，投資方法就係聽「冧巴」及炒消息，所以先搞到咁多人又破產又跳樓。依家嘅投資者教育多咗，投資工具又多元化，股票市場的確比以前成熟好多，呢件絕對係好事。

買股票係買企業未來

祺祺：你喺退休之前，有乜嘢投資「肺腑之言」想同散戶講？

　黃：大家要記住，買股票係買一家企業嘅「未來」，而唔係「過去」，我哋並唔係要買一件舊東西。仲有就係，成日同你講「想當年」有幾叻嘅人，今日佢一定唔叻，因為如果真係叻，佢就講今日喇！做人做事一定要有分析能力，投資遇上唔明白嘅地方，就去搵專家問吓，而唔係搵只識吹水嘅人。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk