市場熱線：潤電憧憬母企注資

人仔上周五衝破6.5大關，通常人仔升值會帶挈國企股，但上個禮拜國企指數表現仲差過恒指，四日加埋跌咗451點，錢莊股首季成績表都好靚仔，但業績後仍係捱沽，航運同鋼鐵股業績差更加死多兩錢重；炒來炒去繼續係水泥股，中建材（03323）派紅股除淨後再升4.8%。

孖屐氣氛略為偏淡

今日另一個好消息係四月中國PMI較三月回落半個百分點，點解回落係好消息？皆因當中購進價格指數回落咗1個百分點，暗示通脹壓力減輕，上個月呢個時候港股就喺公布PMI之後挾上，但依家明明冇乜壞消息，孖屐氣氛卻突然轉淡，人仔新股頭炮匯賢（87001）首日就潛水9%，內地幕牆一哥遠大（02789）話要劈價近一半重新招股，乜事先？劈價後招股PE咪得番10倍唔夠，仲抵過同類股遠東環球（00830）。

今日大笨象（00005）同金錢龜（00011）會公布第一季股息，隻大象炒重組都算係強勢股，所以令恒指跑贏國指，本地地產股亦算有支持，樓價短期好難跌得去邊，淨睇美金貶值同通脹兩個因素，都抵銷晒政府同金管局嘅所有招式。不過，中資股的確走樣，有人驚定「五一」阿爺加息，有人話係老美變相玩QE2.5，總之情況有啲似舊年尾QE2實施初期，美股愈放水愈旺。

上周五又有5間公司批股集資，表現有升有跌，但「超人」唔玩中國木業（00269）即刻大冧，玩細價股真係好大風險。

除咗水泥股之外，電力股上周五大發力，A股好多隻更接近升停板，乜唔係話電力股首季業績好差㗎咩？華電（01071）更要見紅，但睇番近排有關電嘅消息包括：16個省加電費、祖國唔夠電要限電、發改委約見煤老闆勸人唔好加煤價，以上睇落都係好消息，最實惠係加電費，但消息已係兩個禮拜前，而阿爺話唔畀電煤加價亦已好耐，但今次好似特別緊張要約見煤老闆。

不過，社會上最重要係電力，唔夠電喎！你屋企夏天一粒鐘停電都嗌晒救命，所以阿爺今次咁緊張做咁多嘢都係為咗確保電力供應，電力股已經沉咗年幾，假如從電費同煤價着眼而獲得重估投資價值嘅話，追番一半都夠和味。

高層調動增添信心

華潤電力（00836）喺上周五收市後公布首季營運數據，仲公布埋玩「音樂椅」，原主席王帥廷走去中旅，佢個位會由華潤集團董事長宋林出山接任，由母公司高層揸fit始終會有較大信心。王帥廷臨走前話潤電有機會獲阿媽注入新能源同煤炭業務，呢兩個消息應該幾獲孖屐受落，趁依家股價仲算平，可買入作長線投資。

戰報

達進精電（00515）+13%

古晨上周四吼中達進精電，當日低位3.26元，至周五已升抵3.68元高位，短線食胡又賺近13%。

遠東宏信（03360）+10%

古勝上月十九日推介嘅遠東宏信創上市新高8.79元，於當日低位8元上車，走番轉都賺一成。

古勝