滙控（00005）老臣子艾爾敦（David Eldon）重出江湖！滙豐尋日宣布，喺○五年退休嘅Eldon將出任中東滙豐非執行董事及主席。咁大件事，絲絲當然要向Eldon講聲恭喜，佢話好開心接任呢份新工作，因為佢曾經喺中東工作過好長時間。
咁Eldon對新工作又有乜嘢目標？佢話自己始終唔係執行角色，冇講到對中東滙豐有乜目標，不過就會與董事局緊密合作，喺發展策略層面努力作出貢獻。
查實Eldon自○六年開始，已經係杜拜國際金融中心管理局嘅非執行主席，滙控行政總裁歐智華都大讚Eldon喺中東及北非有深厚經驗，有佢出任中東滙豐主席一職，絕對喺滙豐嘅榮幸。
老友同絲絲講，話對於今次Eldon出山一啲都唔意外，因為年齡與工作能力冇直接關聯，既然滙豐想喺中東嘅新興市場大展拳腳，當然要搵輩分高嘅猛人掌舵，加上中東有咁多酋長國，做生意要講人脈，有Eldon坐鎮總好過由人生路不熟嘅管理層空降。
絲絲記得，Eldon退休前除咗係滙豐喺中東地區嘅重臣外，佢亦曾經擔任滙豐亞太區主席、恒生（00011）主席等重要職務，對中東及亞太區事務都有豐富經驗。
余絲韻