聶鳴川之前喺宏利（00945）工作超過14年，可以話係宏利嘅老臣子，離職前任職高級副總裁兼亞洲區首席法律總監。話時話，友邦首席執行官兼總裁杜嘉祺喺去年中由英國保誠（02378）過檔友邦，鍾家富就由中國太平洋人壽跳槽加盟，連同聶鳴川，友邦嘅新管理班子可謂集各方人才，亦反映佢哋好積極吸納人才。
業界爭搶前線人手
其實近期唔單止管理層多變動，市場亦盛傳保險商四圍爭搶前線人手，特別係有客底嘅銷售人員，邀請過檔加薪唔在講，而且動輒有以年薪計嘅「分手費」，假如帶埋原班人馬拉隊過檔，仲有可觀嘅獎勵添。唔知今次聶鳴川過檔，友邦開出乜嘢條件呢？
（余絲韻）