市場熱線：TCL通訊諗得過

國壽（02628）同中鋁（02600）派完首季成績表攬住喊，但內銀喺業績前只係微跌，應該可以交到功課，不過最離奇係尋日先傳五大行會調高資本充足率，跟住中銀監否認，收市後又承認，畀佢玩死。另一單玩死嘅係重鋼（01053），A股停牌一粒鐘，孖屐以為有乜好嘢，冇停牌嘅H股炒到最高2.32元，結果A股公布冇嘢披露，復牌後勁跌接近9%，H股收市僅升1仙，即係高位唔見兩毫。

「名人效應」刺激短暫

「賺錢之神」老邱又有6隻股票好介紹，尋日最醒神係永保林業（00723），其餘新焦點（00360）、北控水務（00371）同勝利管道（01080）都唔錯，但羅欣（08058）同中金再生（00773）兩隻就下跌，所謂「名人效應」，短線上升唔出奇，但中長線始終要睇基本因素。如果冇人跟，佢點做賺錢之神？

古勝期待已久嘅3D三級片上咗畫，而3D數碼（08078）尋日竟暴瀉42%，套戲依家多數係同胞捧場，五一期間可能大收旺場，但股價就唔係同一回事。

老古將中國建材（03323）列為水泥股首選，雖然慚愧地隻股前排跑輸畀其他水泥股，仲見有啲基金趁高減持，但隻股喺上周四衝破咗30蚊之後即刻唔同晒，尋日再升5.3%收報32.65元。

國藥（01099）係呢排抽水最狼嘅公司，擺明要搶上海醫藥頭啖湯，五礦資源（01208）又爭輸澳洲銅礦公司，復牌狂跌9%，中資好多時去買海外資源都會殺出個程咬金畀人橫刀奪愛。

老古尋日推介中興（00763），公司預計今年可以賣1,200萬部手機同平板電腦，今年3G係收成期，智能手機會特別賣得，除咗中興之外，中國無線（02369）同TCL通訊（02618）都係手機股，但股價表現係蚊髀同牛髀。

逐步進軍高端手機

中國無線舊年下半年盈利好核突，TCL舊年賺多30倍，好快又會派首季成績表，之前已公布首季賣手機同配件增長51%，所以可憧憬吓業績。

手機股銷量增長唔在講，好似中無線嘅銷量亦唔差，弊在競爭激烈兼電訊商壓價，所以毛利率暴跌影響盈利。不過，TCL通訊情況唔同，本身係低端手機商，然後逐步向高端發展，所以毛利率受影響程度冇咁大。當然，最主要係公司銷量保持增長，以量去補毛利率嘅不足。TCL通訊依家往績PE係12倍，今年預測PE係9倍，當派首季成績表之後，會對今年能否達標有啟示，如果業績對辦，中線重上9蚊樓上高位唔難。

戰報

國際煤機

（01683）+20%

古晨於本月十三日睇中嘅國際煤機，尋日搶高至8.63元，以推介日低位7.2元計，累賺近兩成。

旭光

（00067）+15%

帥哥四月十四日吼中嘅旭光不斷創高位，昨高見3.81元，較推介日低位3.3元累升逾15%。

古勝